Jer 21 | NdeIBE | STEP | Ilizwi lafika kuJeremiya livela kuJehova lapho uZedekhiya inkosi wayethume kuye uPhashuri indodana kaMalikhiya lomphristi uZefaniya indodana kaMaseyiya. Bathi:

Jeremiah 21

UNkulunkulu Uyasala Isicelo SikaZedekhiya

1 Ilizwi lafika kuJeremiya livela kuJehova lapho uZedekhiya inkosi wayethume kuye uPhashuri indodana kaMalikhiya lomphristi uZefaniya indodana kaMaseyiya. Bathi: 2 “Ake usibuzele kuJehova khathesi nje ngoba uNebhukhadinezari inkosi yaseBhabhiloni uyasihlasela. Mhlawumbe uJehova angasenzela izimanga njengasezikhathini ezedlulayo ukuze asuke kithi.”

3 Kodwa uJeremiya wathi kubo, “Tshelani uZedekhiya lithi: 4 ‘UJehova, uNkulunkulu ka-Israyeli, uthi: Sekuseduze ukuthi ngiziphendulele kuwe izikhali zempi ezisezandleni zakho, ozisebenzisayo ekulweni lenkosi yaseBhabhiloni lamaKhaledi angaphandle komduli ekuvimbezele. Njalo ngizawaqoqa phakathi kwalelidolobho. 5 Mina uqobo ngizakulwa lawe ngesandla eseluliweyo langengalo elamandla ngentukuthelo langokufuthelana kanye lolaka olukhulu.

6 Ngizabatshaya abahlala kulelidolobho, abantu lezifuyo – njalo bazabulawa yisifo esesabekayo.

7 Emva kwalokho, kutsho uJehova, uZedekhiya inkosi yakoJuda, lezikhulu zakhe kanye labantu bakulelidolobho abaphepha emkhuhlaneni, enkembeni lasendlaleni, ngizabanikela kuNebhukhadinezari inkosi yaseBhabhiloni lasezitheni zabo ezifuna ukubabulala. Uzababulala ngenkemba; kayikuba lomusa kumbe uzwelo loba isihawu.’

8 “Phezu kwalokho, abantu batshele uthi, ‘UJehova uthi: Khangelani, ngiyalimisela phambi kwenu indlela yokuphila lendlela yokufa. 9 Loba ngubani osala kulelidolobho uzabulawa ngenkemba, yindlala loba ngumkhuhlane. Kodwa loba ngubani ophumayo kulo ayezinikela kumaKhaledi alivimbelezeleyo uzasila, aphunyuke lokuphila kwakhe.

10 Sengiqonde ukwenza okubi kulelidolobho hatshi okuhle, kutsho uJehova. Lizanikelwa ezandleni zenkosi yase-Bhabhiloni, ezalitshabalalisa ngomlilo.’

11 “Phezu kwalokho, uthi kumdlunkulu wakoJuda, ‘Zwanini ilizwi likaJehova; 12 lina abendlu kaDavida, uJehova uthi: “ ‘Yenzani ukulunga izinsuku zonke ekuseni; mhlengeni esandleni somcindezeli wakhe lowo ophangiweyo, hlezi ulaka lwami luqubuke lutshise njengomlilo ngenxa yobubi elibenzileyo – lutshise engekho ongalucitsha.

13 Ngimelane lawe, Jerusalema wena ohlala ngaphezu kwalesisigodi emagcekeni alamadwala, kutsho uJehova – lina elithi, “Ngubani ongazasihlasela na? Ngubani ongangena esiphephelweni sethu na?”

14 Ngizalijezisa njengokufanele izono zenu, kutsho uJehova. Ngizaphemba umlilo emahlathini enu ozalobisa konke okuseduze lani.’ ”